अधिराजकुमारी त्रैलोक्य राज्यलक्ष्मी देवी शाहको जन्म राजा त्रिभुवन र रानी कान्ति राज्यलक्ष्मीकी जेठी पुत्रीको रुपमा विक्रम संवत् १९७९ सालमा भएको थियो । मूल परेर जन्मेको कारणले परिवारलाई पीडा दिने योग रहेको भन्दै उनको पालनपोषण फुपू रमा राज्यलक्ष्मी राणाको घरमा भएको थियो ।
मूल परेर जन्मेको कारणले उनीसित विवाह गर्ने केटा नै पाइएन । बल्लबल्ल भारतको सिकर राज्यका राजकुमार हरदयाल सिंह उनीसित विवाह गर्न तयार भए । हरदयालले पहिलो पत्नीसित पारपाचुके गरिसकेका थिए ।
२००४ साल माघमा राजकुमार हरदयाल सिंहसित विवाह गरेर त्रैलोक्य राज्यलक्ष्मी देवी शाह सिकर राज्यकी युवराज्ञी भएर राजस्थानको सिकर गइन् । उनी हरदयाल सिंहभन्दा ८ महिना जेठी थिइन् ।
तर यो जोडीबाट संतान भएन। अकस्मात २०११ साल असारमा राजकुमार हरदयाल सिंहको निधन भयो । ३२ वर्षको उमेरमैं त्रैलोक्य राज्यलक्ष्मी देवी सिंह बिधवा भइन् । उनी १५ वर्षसम्म आफ्ना सासुससुराको सेवा गर्दै सिकरमैं बसिन् । उनको परिवारमा अरु सदस्य कोही थिएनन् ।
सासुससुराको निधनपछि राजकुमारी त्रैलोक्यले सिकर राजपरिवारको पुरै श्रीसम्पत्ति र दरवारलाई एउटा ट्रस्ट बनाएर दान गरिन् । सो ट्रस्टले संचालन गर्नेगरि उनले सिकरमा आफ्ना ससुरा र पतिको नाममा विद्यालय र अस्पताल खोलिन् ।
२०२७ सालमा उनले आफूलाई सिकरमा दुलहीको रुपमा भित्राउँदा जुन ठाउँमा यज्ञवेदी बनाइएको थियो त्यही ठाउँको एकमुठी माटो र साथमा १२ वर्षको एकजना धर्मपुत्र ल्याएर माइती देश नेपाल फर्किइन् । त्यतिखेर राजकुमारी त्रैलोक्य ४८ वर्षकी थिइन् । ६७ वर्षको उमेरमा २०४६ साल पुसमा उनको काठमाण्डौमैं निधन भयो ।
राजकुमारी त्रैलोक्यको धर्मपुत्र भएका तिनै बालक राव विक्रम सिंह नै श्री ५ युवराज्ञी हिमानीका पिता हुन् । राव विक्रम सिंहले १३ वर्षको उमेरमा बझाङकी कन्या विपुला सिंहसित बिबाह गरेका थिए । विपुला जयपृथ्वीबहादुर सिंहकी भतिजी पर्छिन् ।
#Khagendra Giri Kopila
