नेकपा एमालेका तत्कालीन महासचिव मदन भण्डारीक‍ो असामयिक निधन स्मरण

३२ वर्ष अगाडि आजकै दिन नेकपा एमालेका तत्कालीन महासचिव मदन भण्डारीक‍ो असामयिक निधन भएको थियो ।

२०५० जेठ ३ गते म पोखराबाट काठमाडौ तर्फ जाँदै थिए । दिनभर जसो पानी परेको हुँदा बाटो असहज थियो । ठाउँ ठाउँमा पहिरो खसेको हुँदा मुगलिङ पुगेपछि बस अगाडि जान सकेन । बाटोमा अलपत्र पर्नुभन्दा मुगलिङ बस्दा सहज हुने भन्दै बस मुगलिङमा नै बस्यो । त्यहाँ केही घण्टा अगाडि देखी सडक बन्द भएको हुँदा बसहरु धेरै थिए । म पनि दिउसै देखि सडक खुल्ने आशामा मुगलिङमा अल्झिरहेको थिए । त्यहाँ अचानक सुनियो, मदन भण्डारी चढेको गाडी नारायणीमा खसेको भन्ने सुनियो । धेरैका धेरै कुराहरु सुनिएका थिए । केवल अडकल काट्नु बाहेक केही यकिन गर्न सकिने थिएन । मृत्युु भएको भन्ने सुनिएन तर घटनाको भने चर्चा निकै भयो । राति साढे एक बजेतिर एकतर्फी खुलेको भन्दै बस अगाडि बढ्यो । बिहान काठमाडौ पुगेपछि बिहान समाचारमा थाहा भयो, वहाँ सहित वहाँको साथ जानुभएका जीवराज आश्रितको पनि निधन भएको रहेछ ।

दुर्घटना आकस्मिक थियो वा घटिट थियो, थाहा हुन सकेन । तर जल्दाबल्दा नेताको निधनमा धेरैले आशंका गरे । समय बित्दै गयो अब त केवल श्रद्धाञ्जली मात्र दिन सक्छौ । हत्या हो वा दुर्घटना हो वास्तविक छानविन नै भएन वा गर्न चाहेन । देशको परिवर्तनको एउटा आशा थियो सेलायो । २०५० बाट आजसम्म देशमा धेरै परिवर्तन आए । तर वहाँ त्यो परिवर्तनको साक्षी बन्न पाउनु भएन ।

सन १९९१ को मे २७ को न्यूजविकको अंकमा वहाँको अन्तर्वार्ता छापिएको थियो, जसको शीर्षक थियो – In Nepal, Karl Marx lives. वहाँका बिचारहरुले गर्दा कार्ल मार्क्सको पूनर्जन्मको तर्क सम्म गरिएको थियो ।

२००९ असार १४ गते ताप्लेजुङको ढुङ्गेसाँघुमा जन्मनु भएका स्व. मदन भण्डारी, एक शिक्षित तथा बुद्धिजीवी राजनीतिकर्मी हुनुहुन्थ्यो । २०४६ सालमा नेकपा मालेको महासचिव बन्न सफल हुनुभएका वहाँ पछि नेकपा मार्क्सवादी संग एक भएपछि बनेको नेकपा एमालेको पनि महासचिव चयन हुनुभएको थियो । २०४६-४७ को जनआन्दोलनमा बाममोर्चाको तर्फबाट सक्रिय रहनु भएका वहाँ, देशमा आएको परिवर्तन संगै २०४८ सालमा भएको बहुदलीय संसदीय निर्वाचनमा काठमाडौं क्षेत्र नं १ बाट नेपाली कांग्रेसका सभापति एवम् अन्तरिम प्रधामन्त्री कृष्णप्रसाद भट्टराईलाई पराजित गरी प्रतिनिधि सभाको सदस्य बन्नुभएको थियो । वहाँ काठमाडौं क्षेत्र नं ५ बाट पनि विजयी बन्नुभएको थियो ।

देशको प्रमुख राजनीतिज्ञ एवं भविष्यमा प्रधानमन्त्री बन्ने सम्भावना बोक्नुभएका वहाँको २०५० जेठ ३ गते सडक दुर्घटनामा अविश्वसनीय रुपमा निधन भयो ।