१५ साउन, ललितपुर । ‘किरात लोकपरम्पराको निरन्तरता’ भन्ने नारासहित वाम्बुले राई समाज, नेपाल (वाम्रास) केन्द्र ले दशौँ वाम्बुले लोकपरम्परा बाँसुरी दिवस विविध सांस्कृतिक कार्यक्रमका साथ सम्पन्न गरेको छ।
वि.सं. २०७४ साल साउन १५ गतेदेखि मनाउन थालिएको बाँसुरी दिवस पछिल्ला केही वर्षयता विनायो वादन तथा खीर खाने परम्परा समेत समेट्दै थप आकर्षक, उत्साहपूर्ण र सांस्कृतिक महत्व बोकेको पर्वका रूपमा विकसित हुँदै आएको छ।
महालक्ष्मी नगरपालिका वडा नं १, इमाडोल, नयाँबस्तीस्थित वाम्रास केन्द्रको सभाहलमा आयोजित कार्यक्रममा वरिष्ठ संस्कृतिविद् प्रेम बानियाँ प्रमुख अतिथि रहेका थिए। कार्यक्रममा संस्थाका विशिष्ट सदस्य तथा राष्ट्रगानका रचनाकार व्याकुल माइला को विशेष उपस्थितिले कार्यक्रमको गरिमा अझ बढाएको थियो।
संस्थाका अध्यक्ष गुजरधन राईको अध्यक्षतामा सम्पन्न कार्यक्रममा उपाध्यक्ष तथा कार्यक्रम संयोजक गणेश वाम्बुले सहित संस्थाका अधिकांश पदाधिकारी तथा सदस्यहरूको उल्लेखनीय सहभागिता रहेको थियो।
कार्यक्रममा बाँसुरीवादक जीवन राईको नेतृत्वमा बाँसुरी वादनको विशेष प्रस्तुति गरिएको थियो। त्यसैगरी, वाम्रासको भ्रातृ संस्था वाम्बुले राई सांस्कृतिक कलाकार समाज ले वाम्बुले जातिको मौलिक लोकभाका राम्दले लगायतका सांस्कृतिक प्रस्तुति प्रस्तुत गरी सहभागीलाई मनोरञ्जन प्रदान गरेको थियो।
वाम्बुले समुदायमा विशेषगरी युवा पुस्ताबीच बाँसुरी वादन पुस्तौँदेखि जीवित लोकपरम्पराका रूपमा रहँदै आएको छ। समुदायको लोकमान्यताअनुसार साउन १ गतेदेखि १५ गतेसम्म नाचगान तथा बाजागाजा बजाउन निषेध गरिन्छ। यस अवधिमा गाउँघर सांस्कृतिक गतिविधिका दृष्टिले शान्त रहने र साउन १५ गतेदेखि मात्र बाँसुरी वादन तथा नाचगान पुनः सुरु गर्ने चलन रहिआएको छ।
वाम्बुले समुदायको मौलिक बाँसुरी परम्पराको संरक्षण, प्रवर्द्धन र पुस्तान्तरण गर्ने उद्देश्यले वाम्बुले राई समाज, नेपाल (वाम्रास) केन्द्रको केन्द्रीय समितिले वि.सं. २०७३ सालमा प्रत्येक वर्ष ‘बाँसुरी दिवस’ मनाउने निर्णय गरेको थियो। सोही निर्णयअनुसार वरिष्ठ पत्रकार गणेश वाम्बुलेको संयोजनमा वि.सं. २०७४ सालदेखि बाँसुरी दिवस निरन्तर रूपमा आयोजना हुँदै आएको छ।
यसै परम्परालाई निरन्तरता दिँदै ओखलढुङ्गाको मानेभञ्ज्याङ गाउँपालिका–६, हिलेपानीस्थित मितेरी भञ्ज्याङमा पनि दशौँ बाँसुरी दिवस भव्य रूपमा मनाइएको छ। स्थानीय युवा तथा सामाजिक संघ–संस्थाहरू—सगरमाथा युवा क्लब, मितेरी युवा क्लब, सुनाखरी कोशेली युवा क्लब, फुलबारी युवा क्लब र नयाँ नेपाल सरोकार समाजको सक्रिय सहभागितामा कार्यक्रम आयोजना गरिएको हो। कार्यक्रम सञ्चालनका लागि सुरेश कुमार राईको संयोजकत्वमा गगन राई सचिव र दिलीपकुमार राई सदस्य रहेको तीन सदस्यीय आयोजक समिति गठन गरिएको थियो।
मानेभञ्ज्याङ गाउँपालिकाका अध्यक्ष ज्ञानेन्द्र रुम्दालीको प्रमुख आतिथ्य तथा उपाध्यक्ष आश्रचन राईको विशेष आतिथ्यमा सम्पन्न कार्यक्रममा स्थानीय जनप्रतिनिधि, समाजसेवी, बुद्धिजीवी, युवा तथा सर्वसाधारणको उल्लेखनीय सहभागिता रहेको थियो। बाँसुरी वादन, सांस्कृतिक प्रस्तुति र खीर वितरणसहित सम्पन्न कार्यक्रमले स्थानीय लोकपरम्पराको संरक्षण तथा पुस्तान्तरणमा महत्वपूर्ण योगदान पुर्याएको आयोजकहरूले बताएका छन्। फोटो सामाजिक सञ्जालबा साभार
भिडियो लिंक :
